ياراشد العليا لها عشرة ابنود _ سجل وأنا بمليك وأحفظ عددها
من شان مايلحقك عيب ومنقود _ إحفظ وصاتي والوصاه أعتمدها
أوصيك قبل الجسم يدبي به الدود _ في حفرة لابد نسكن لحدها
دنيا العنا فيها مشاريب واعدود _ كم واحد له حاجة ماوجدها
عليك بالتقوى ترى العمر محدود _ واردع هوى النفس الدنيه وقدها
واحفظ صلاتك تكسب الرزق والفود _ تكسب مكاسيب الحياه وسعدها
وصوم ارمضان وزك يالشامخ الطود _ ترى البيوت النايبه من عمدها
وجالس هل التوحيد والعز والجود _ واترك مقاريد العباد وقردها
الي على التفريق يجونك احشود _ فصيلة دب الحسد في جسدها
واحسن جوار الجار لو كان مقرود _ لو جار نفسك لاتبين نكدها
والضيف عطه الطيب والطيب مردود _ واكسب جناب الطيبين وسندها
عقب الشحم والبن قدمله العود _ حيثك من الي من لفاها حمدها
وبنت الردي لو هي زلال وبرهود _ حذراك تقربها وتمسك بيدها
خذ بنت قرم عند الاجواد محمود _ لاجا نهار الهوش بين ولدها
وزلة رفيقك لالفت دون مقصود _ لاتمسك الزله وهو ماقصدها
ثلاث مررها ولاشك بشهود _ والرابعه شب الحطب لاوردها
هذي عشر وان كان تبغيني أزود_ سجل على عشر الوصايا وزدها
الظلم شين وتالي الظلم مردود _ والغيض شيطان القلوب وكددها
والصمت زينه والحكي سيف محدود_ والحقد غيمه والتباغض بردها
فكر وميز واعرف البيض والسود_ واحذر قلوب الحاسدين وحسدها
يابوك بين الناس طارد ومطرود_ ماتجهله بعض الحرار وهددها
وان ضامتك دنياك واصبحت مضهود_اطلب من المولى يحلل عقدها
الواحد الي كلناا له اسجود_ الي جميع أعمال خلقه رصدها
هذي نصيحه وانت معطيني اوعود _ واهل الوفاء والعرف توفي وعدها
قدمتها بالمسك والطيب والعود _ زرعتها لك زرع وأنت أتحصدها
حميتها من دون ملح وبارود_ خوف عليها المنتقد ينتقدها
واختامها العليا لها عشرة ابنود_ يالي تبي العليا تمعن وعدها